” 5 أشياء لازم تعرفهم قبل ما تدخل الشريعة وما تتخرج وانت مش مجربهم “

الحكي موجه لطلبة الشريعة عامة وبالاردنية خاصة ^^
1- طلبة الشعوب الإسلامية
اكثر كلية فيها طلبة اعاجم هي كلية الشريعة فاذا كنت بتحب تتعرف ع ناس وثقافة جديدة (اكلات جديدة ولغة ) وناس لطيفين فما الك الا تضل ملزق فيهم ..احكي معهم باللغة العربية الفصحى (حتى لو ما بتعرف عادي بعلموك هههههه) مع انو الاصل العكس يصير .. اضرب صحبة معهم وساعدهم بالدراسة احيانا بتكون لغة الكتاب جامدة بتحتاج توضيح ..التعامل معهم اشي بفيدك قبل ما تفيدهم ..تجربة ممتعة واطلع معهم رحلات (فرصة بتكتشف بلدك)
2- في اشي اسمه التبادل الطلابي (محلي / دولي ) يعني بتقدر تسافر برا الاردن خلال دراستك الجامعية تخيل !!
وبتقدر تدرس بجامعة ثانية داخل الاردن حتى تستفيد من الدكاترة مثلا تروح تدرس بجامعة اليرموك بكون في عدد ساعات مخصصة تقريبا 24 ساعة للدراسة داخل الاردن و 12 ساعة حتى تدرس خارج الاردن مثل دراسة الشريعة بتركيا وبالجامعة بتغطي معظم تكاليف السفر
فإذا كنت مهتم بالسفر (مين فينا ما بحب السفر !!) وبتحب تدرس بأكثر من جامعة اول ما تدخل الجامعة بتطير ع مكتب العلاقات الدولية حتى تستغل الوقت وتستفسر عن كل اشي وبتعرف متى موعد التقديم وهيكا .
لسا ما طلعنا من سيرة السفر
3-عمرة الشريعة
كل سنة بتنظم الشريعة رحلة عمرة للطلاب بشرفوا عليها دكاترة وبتكون مميزة جدا بالأجواء كم مرة كان حلمك تسافر مع صاحبك ..ومش اي مكان رايحين عليه ..والاحلى والاهم من هالحكي انو طالب الشريعة بس بدفع 25% من تكاليف الرحلة ( ما بمزح ) و بس لازم يكون الطالب دارس مادة السيرة النبوية .
4- العظماء دكاترة الشريعة
دكاترة تعاملهم من اعلى المستويات حرصهم عالطلاب كحرص الأب على أولاده والام على بناتها ، ابواب مكاتبهم مفتوحة عشانك اذا عندك اي سؤال اي استفسار ..بسمعوك و بحاولوا يستوعبوا كلامك وتفكيرك لاخر اشي (وفوق منها حبة ملبس ) ولو عندك فكرة بدعموك وبقدمولك النصيحة ومكاتبهم غزيرة بالكتب ممكن تستعيرها
غير عن العلم اللي عندهم واسلوبهم بشرح المحاضرات
5- الأفرقة الطلابية
الكلية مليانة افرقة طلابية وكل فريق مسؤول عنه دكتور من دكاترة الشريعة وبخص موضوع محدد مثلا : فريق مختص لمساعدة الطلبة الاعاجم ، فريق مختص بالسنة النبوية وعلومها ، فريق بالاعمال التطوعية ، فريق بعطي دورات للعلوم الشرعية .. ما تضيع ع حالك 4 سنين جامعة وانت مش منتسب لفريق او كعمل فردي في اي نشاط داخل او خارج الكلية منها بتتحمل مسؤولية ..شخصيتك بتصير قوية ..وعالأقل تركت أثر وراك
كلية الشريعة بتستناك وبستنى طاقاتك =)