السلام عليكم و رحمة الله و بركاته
اسمي نتالي مراد خليل قوفبز، خريجة الجامعة الاردنية، تخصص تغذية الانسان و الحميات، تخرجت الاولى على دفعتي و كليتي الحمدلله، انا كنت اعتقد انه حتى اوصل للنجاح لازم ادرس التخصصات اللي مجتمعي بعتبرها افضل التخصصات ! بس هلأ بقدر احكيلكم بكل ثقة انه لما الواحد يدرس الاشي اللي بحبه بكون كل يوم بحياته عبارة عن قصة نجاح! مش ممكن اتخيل حالي خريجة اي تخصص ثاني، هذا التخصص قدر يجذبني من اول محاضرة ” اساسيات تغذية”، كنت احضر المحاضرة و ما احس بالوقت فيها و اتمنى لو اضل كمان ساعة اسمع دكتورتي. بنفس الوقت ما تركت الحياة الجامعية تروح مني، تعرفت على كثير ناس و عشت حياة اجتماعية داخل الجامعة و خارجها، لدرجة اني فتحت مشروع صغير الي و اشتغلت فيه من سنة ثالثة جامعة، كنت انسق رحل لاعداد كبيرة و اطلع مغامرات بالاردن ! الحياة اكبر من انه الواحد يركز على جانب واحد و ينسى الجوانب الثانية العديدة ! تخرجت من الجامعة و مباشرة لقيت شغل بتخصصي بس المشكلة كانت انه كنت اكره اروح على الدوام مع انه كنت اشتغل بصلب تخصصي بس ما كان بالجانب اللي انا حبيته ، تركت الشغل و الله رزقني شغل ثاني اقرب للجانب الانساني، بجمعية عون اللي هدفها تساعد اكثر عدد من اللاجئين و حتى الاردنيين اللي ما عندهم القدرة للعلاج الصحي، انا حاليا هدفي الرئيسي علاج الاطفال و الحوامل و المرضعات اللي عندهم سوء تغذية و بحاجة للاكل و التوعية التغذوية لحتى يعيشو ! هلأ بعرف اني بالجانب الصح من التغذية لأنه كل صبح عم بروح على شغلي و انا متحمسة و مبسوطة الحمدلله ،،، فنصائحي الكم هي، اختارو التخصص اللي انتم بدكم اياه بغض النظر عن رأي المجتمع، ابدعو بتخصصكم و ادرسو لحتى توصلو لدرجة التفوق بس لا تنسو انه الحياة مش بس دراسة،و اهم اشي بس تطلعو لسوق العمل خلو مخافة الله بين عينيكم لأنه كل وظيفة مهما كانت، الها تأثير على المجتمع و هذا التأثير لازم يكون ايجابي لحتى نطور البلد اللي نحن فيه. بتمنى اني اكون سهلت عليكم المرحلة القادمة لأنني بتذكر صعوبة اتخاذ القرار لانه هذا القرار اول قرار حقيقي راح تتخذه بحياتك.