اسمي سوزان صالح ، عمري ٢٤، درست اقتصاد بالجامعة الاردنية ، وهلأ عندي مشروعي اسمه “Kitchensta “, مشروع مطبخ إنتاجي .
ارجعلكم من البداية ، وين كانت البداية ؟ يمكن بالصف الثامن ، كان في بحصة المهني دورات لإنجاز ، أخدنا وقتها دورة الاقتصاد من حولي ، وانا ومحيطي ، كانت الدورات بتركز علينا كيف نحدد اهدافنا وكيف ندخل سوق العمل -حسب ما بتذكر – وقتها للامانة كنت بدي ادرس هندسة عمارة ، بس الله بعتلي معلمات رياضيات وفيزياء بصفوف تاسع وعاشر خلوني ألغي فكرة العلمي ودخلت إدارة معلوماتية .
نجحت بالتوجيهي وجبت ٨٥ ، كان خياري المتاح هو الجامعة الاردنية ، عالتنافس طلعلي تخصص عمل اجتماعي ، وعالموازي اقتصاد أعمال ، اخترت الاقتصاد ، ولا هو اختارني .. مش عارفة وقتها قديش كنت واعية لأهمية الاختيار .. المهم درست ال٤ سنين وطلع الاقتصاد في كتير احصاء ورياضيات وانا ما بحبهم
كانت سنين الجامعة حلوة كتير عشت فيهم تجربة العمل الطلابي ، عملت أنشطة وتطوعت بمبادرات ، وصار إليّ علاقات منيحة ، تخرجت وانا بحب الجامعة وبحب انه اخترت تخصص ما بدّه دراسة ٢٤ ساعة ، لأني اكتسبت مهارات اكثر من ال١٣٢ ساعة تخصص ، مهارات فادتني بمشروعي هلأ .
بعد الجامعة تزوجت وسافرت على السعودية ، اول سنة كنت ماخدة فترة نقاهة من الجامعة ، وحابة استوعب مرحلتي الجديدة -انتقال لبلد تانية وزواج- السنة التانية بدأت أدور على شغل ، اشتغلت بمدرسة كمعلمة لمدة ٣ أسابيع وما كملت لعدة ظروف ، بعدها أعطيت دروس خصوصي لمدة فصل وبرضه ما كملت -اول مرة احكي هاي المعلومة هون-، فعليا ما كنت ألاقي حالي ابدا، وفكرة اني اشتغل بمهنة التعليم ما لقيتها بتناسب شخصيتي ولا حتى بأي وظيفة ، كتير كانت معلقة ببالي مقولة انه الوظيفة هي استعباد القرن ال٢١ ..
كان في سؤال مهم عندي لازم أجاوبه ، انا شو بحب ، وهون الزبدة من كل الحكي اللي قبل ، مرة كنت بدي اكون مصورة ومخرجة زي الاء حمدان ، ومرة كنت بدي اكون معلمة زي جمانة حياري ودانية و و و ، ومرة كنت بدي اشتغل ببنك او شركة زي تالة .. ما كنت عارفة انا شو بحب .. ولا كنت محددة هويتي الخاصة، مع انه كان عندي فكرة اني افتح مطعم بس على مدى بعيد جدا ، وكانت فكرة مستحيلة لانها بدون تخطيط
وانا ما كنت ألاقي سوزان بهاد كلّه ، رجعت لأحلامي والاشياء اللي بعرف اعملها وبستمتع فيها ، لقيت انه الطبخ عندي مش بس هواية ، بالعكس هو مشروع ، وقدرت أترجمه على ارض الواقع ب Kitchensta بفضل ربنا ، واستفدت من الاقتصاد بشكل او بآخر بمشروعي ، وهيني لسه بالبداية وبتمنى أوصل لأحلامي ، وبيوم باْذن الله رح افتح مطعم .
يمكن لو رجع فيي الزمن ادخل الأكاديمية الملكية لفنون الطهي ، بس انا ما كنت محددة شو بدي ولا كنت واضحة مع نفسي ، نصيحة لكل طالب وطالبة بختاروا تخصصهم الجامعي ، يكون عندهم حرص على هاي الخطوة لانها بتحدد امور كتير بالحياة ، ويعرفوا شو بحبوا يشتغلوا ، ويختم بمقولة : أنّ عمل المرءِ في مجالٍ يُحِبُّه ويتقنه لهو أمرٌ بمثابةِ أن لا يعملَ أبدًا !