هاي قصتي وقصتي ميمعة ومبنية كلها على قررات متسرعة وبالنهاية زي ما يقولو صفعتني الحياة كف صحتني!
اسمي هبة بس الواضح اسمي ما وفى معنى بالنسبة لأهلي ، وللعلم بهاي القرارت كانو اخر من يعلم.
أنا سنة رابعة وهاد الفصل بكون اول فصل بكمله وانا ثابتة بتخصصي، يعني خلينا نقول كل فصل او سنة بتخصص بحياتي ما ثبتت بتخصص اكتر من سنة
خلصت هالتوجيهي وبدي علم نفس كان في معارضة كبيرة على هاد التخصص من الي حولي وما زبطت الامور ، فرحت لغات كوني بحبها ، وصدقا هي تحب ودراستنها ممتعة بس اللغة الي طلعتلي ما كنت احبها وهي تركي ولأكون ادق كرهتها ، وبعد سنة حولت لكوري كان الشي الوحيد الي بقدر احول علية طبعا ما بعرف شي عن اللغة الكورية ببس بعرف انه مسلسلاتهم حلوه وهي كان اول قرار غبي .
فبعد فصل كامل من الفشل الذريع احترمت نفسي ورجعت لتخصصي التركي عشان احفظ ما تبقى من ماء وجهي وللتذكير هي تاني حركة بعملها بدون اي تفكير !
على العموم تركت الدراسة على الجنب وكان فترتها فيه اعتصام في الجامعة الأردنية وكنت اصور فيه وكان من اجمل التجارب بالحياة
لأنك كمصور بتشوف كل اشي وبتراقب كل شي وبضلك منتظر اللقطة الصح لتاخدها والي ما بتتكرر واذا بدي احكي عن تجربتي في الإعتصام ما حخلص
وجرني الاعتصام المفتوح لأطول اتحاد طلبة مر على الجامعة الأردنية واظن عكل الجامعات في الأردن وأشتغلت في بالمكتب الإعلامي وبالديوان بشكل رئيسي اشتغلت فيه سنة كاملة واتعلمت كتير اشياء وزي ما اعطيت اخدت كتير، وكان للعمل الطلابي دور كبير في تغيري ووقتها لأول مرة باخد قرار صح، وقررت احول لتخصص علم النفس للشي الي كان نفسي فيه من الأول.
وبدون ما يدرى حد اسقطت الفصل وحولت تخصصي وبعدها مع صدمة اهلي بلشوا يفكروا يغيروا اسمي 🙂
وهيني طالبة سنة رابعة مفروض على ابواب التخرج، بسبب قرارت مش مدروسة رح اتخرج ب 6 سنين، بس لو ضليت بتخصصي القديم كنت رح اندم اكتر وكنت ما حتخرج اصلاً , وحاليا كل شي مختلف وكل شي احسن الحمدلله..
واللي بدي احكيه: ما تدخل الجامعة وتطلع منها وانت ما ضفت شي لنفسك، ادرس الشي الي بتحبه واعمل الشي الي بتحبه ودور على المكان الي بناسبك, وتجربة العمل الطلابي من اهم التجارب الي لازم تخوضها لأنها حتساعدك اكتر من ما بتتخيل
رحلة الجامعة رحلة 4 و 6 او 7 سنين بحالتي …
حتمر بمراحل فشل ونجاح وهي الي بتعلمك والي بتصنعك
ولا تدخل الرحلة وتطلع منها بدون ولا شي .