كل انسان بحياته في شغلة معينة بحب يعملها و بتميزه.. بس اللي بشوفه بحالي اني بحب كل شي و مافي شي مستقرة عليه و هالشي غلبني باختيار تخصصي!
لما كنت توجيهي ما كنت بعرف شو بدي ادرس الف شغلة  كانت  براسي.. مرة اقول اشي بالطب ، بالعلوم  ،الرياضة، فنون ، هندسة و هيك يعني ملخبط كل شي ف قلت انه بدي اجيب معدل يدخلني تنافس اي شي المهم اجيب بالتسعينات بس ما جبت هههه المهم لما خلصت توجيهي طلعلي عالفيس بوك عن ( عينك عالمستقبل) قلت خليني اروح اشوف بلكي استقريت و عرفت شو ميولي .. رحت و اكتشفت تخصص ولا مرة سمعت فيه اسمه العلاج الوظيفي حبيته كتير و قلت خلص هاد هوه و بساعد الناس و هيك .. فكرت انه تخصص مش سهل ولا صعب و مافي هالحفظ الكتير بس ما انتبهت اني رايحة عطريق الطب و الحفظ ههههه المهم سجلت و كنت حاكية لبابا ما بدي غير تنافس بس ما رد علي حطلي هاد التخصص عالتنافس و الموازي ف لما طلعت النتائج طلعلي موازي ادرسه .. ما رضيت اولها عشان بدي تنافس و صار نقاش بيني و اهلي ف رحت استخرت و ارتحت للتخصص قلت اكيد فيه خير ان شاء الله  .. لما بلشنا ناخد محاضرات انا اكتئبت بعدهم انه هاد كيف بندرس! كيف بدي احفظ! و انا ما الي عالحفظ انا بفهم المادة و بجاوب بصيغتي مش حرفي وهالشي اللي نزل معدلي بالتوجيهي ! و صرت اكتشف اكتر ميولي و انا شو بحب فقررت احول عتخصص كان ببالي من قبل بس ما بعرف شو صار و ما قدمتله وقتها ف قلت استخير اول بعدين احكي لبابا انه احول و استخرت لمدة اسبوع ف باليوم اللي حسيت اني بدي احول رحت تناقشت مع اهلي ،ما كان عندهم مانع بس من ضمن النقاش في شغلة ما ارتحتلها ف صرت اسال و ادور و صارت الامور تتعكز قدامي ف عرفت انه الله عم بوصللي انه الاحسن الي هوه العلاج الوظيفي ف ما حولت و رضيت فيه .. هلا انا بحب التخصص كتير بس كل امتحان بندم اني دخلت تخصص بده حفظ وهيك انا لسة ما بلشت بالجد كمان 😂😂 و بزعل اني ما حولت.. بس بقعد اتزكر كيف كل شي صار معي.. كيف بدور حولين تخصص واحد! كل الطرق كانت ترجعني اله ف بصير احمد ربي عكل شي لانه بتزكر انه ربنا ما بختار لعباده الا الخير و الافضل الهم ، بهدى و بضل ادعي” اللهم خر لي الخير حيث كان و رضني به.”
ان شاء الله الخير حشوفه لقدام بتخصص العلاج الوظيفي و اسفة عالقصة الطويلة بس الي بدي اوصله انه حلمك مش دائما اختيارك اله هو صح  يمكن شر الك اصلا و اهلك لما يوقفوك عن الي بتحبه يمكن ربنا بعتهم الك عشان التخصص مش خير الك .. فكر بناحية ايجابية و بشو رح ينفعك تخصصك بدنيتك و  اخرتك .. و استخير على كل شي بدك تعمله خلي ربنا يختارلك طريقك حتى لو ما بتحبه هلا بس بعدين حتحبه و تحمد الله عالخير الي فيه.. و بالنهاية عسى ان تكرهوا شيئا و هو خير لكم و عسى ان تحبوا شيئا و هو شر لكم..