عندك اهتمام ,حب اوهواية للتمثيل,الاخراج او للمسرح كله بشكل عام ؟ اذا كان الجواب نعم لأي وحدة من هدول فانت وصلت للمكان الصح و التخصص الصح , تخصص الفنون المسرحية بالجامعة الاردنية هو التخصص المناسب الك , التخصص بعلمك و بنمي فيك كل الجوانب الموجودة بالمسرح من تمثيل لاخراج لكتابة نصوص مسرحية لطبيعة الديكور و الاضاءة و الازياء المستخدمة على خشبة المسرح , يعني التخصص بعلمك كل اشي بهمك تعرفه عن المسرح .
طبيعة دراسة التخصص عملية اكثر من نظرية لكن بدون تهميش للجوانب النظرية اكيد , يعني في مواد عملية و في مواد نظرية .
طبيعة الاعمال الممكنة بعد التخرج متنوعة فممكن تصير ممثل , مخرج , معلم للدراما , تعمل في احدى تقنيات المسرح اذا كنت مبدع فيها اثناء دراستك , تعمل في احدى المؤسسات اللي بتدعم الفن و المسرح و غيرها من الفنون.
ممكن تسأل حالك طيب ليش هاد التخصص مش معروف او اول مرة بعرف انه بدرسوا هيك اشي , معك حق لانو نادرا ما تلاقي ناس بهتموا بهاد الاشي و الثقافة المسرحية الموجودة عنا بالاردن تعتبر غير منتشرة كفاية , مع انو المسرح يسمى ابو الفنون و يمكن باستخدام المسرح انو نسلط الضوء عل مواضيع مهمة و نقدمها بطرق جميلة و ترسخ في الذاكرة , مشان هيك احنا حابين ننشر تخصصنا مشان نقدر ننشر جمالية المسرح و انو بامكانك تدرس تخصص انت فعليا حابه او مهتم في و ممكن تعمل تغيير باستخدامه .
فاذا انت مهتم باي جانب من جوانب المسرح بنستناك/ي تنضموا النا و تعيشوا فترة من حياتكم ما بتنسوها .