اكيد اكيد اي تخصص الا ما يطلع عليه إشاعات خرافيه ولا تمت الو بصله وبتكون جد ظالمه للتخصص ، للاسف معظم الطلاب والناس بسمعو لهاي الاشاعات وممكن ما يدخل الطالب التخصص من وراه هاي الاشاعات، ومن هاي الاشاعات على التخصص:
الاشاعه الاولى وهي اشهر اشاعه واكبرهم (فني الكبسه) يا الله شو بكرهها هاي الاشاعه لانها ظالمه ظلم خرافي النا ، تعب ٤ سنين وبالاخر تحكيلي فني كبسه !! الاغلب بفكر انو احنا نكبس الكبسه والجهاز لحالهبعمل كل اشي وهذا خطأ كبير لانو احنا الي نعمل كل اشي واي غلطه منا ممكن الصوره تطلع غلط بتالي تشخيص غلط.
الاشاعه التانيه ، وهي انو لما اي حدا يسمع كلمه فني أشعه على السريع بفكر بس انو احنا نشتغل على جهاز واحد وهو جهاز الاشعه السينيه X-Rayاو جهاز تصوير الكسورعلى قولتهم وهذا خطا كبير لانو احنا نشتغل على كل أجهزه الاشعه والتصوير ومنها الفلورو والرنين المغناطيسي والطبقي واجهزه الطب النووي والعلاج بالاشعه وتصوير الثدي وهشاشه العظام وغيره.
الاشاعه التالته ، فني الاشعه ما بفهم بصور الاشعه ، مهو عمركم شفتو حدا ما بفهم بصور هو درسهم ٤ سنين ، احنا ناخد تشريح ونعرف كل نتفه بالجسم وناخد مبادئ تشخيص ونعرف نشخص شوي ونعرف شو المرض بس اكيد مو متل طبيب الاشعه.
الاشاعه الرابعه ، فني الاشعه هو الي بكتب هو الي بكتب تقرير الاشعه للصوره، هلا صح إنا نفهم بالصور ونعرف مبدئيا اذا الوضع طبيعي او لا بس اكيد مش متل طبيب الاشعه واحنا ما بنكتب التقرير ولكن نفهم شو مكتوب بالتقرير ونعرفه ، وفي اشياء كتير طبيب الاشعه بحتاجنا فيها وخاصه بالتصوير لانو مش شغله وما بعرف فيها متلنا وخاصه بالاجهزه وطريقه التصوير ( انو بطلب الصوره الفلانيه بس ما بعرف تبعاتها للصوره وكيف تنعمل وتتصور، وهاد شغلك كفني اشعه شاطر)
والاشاعه الاخيره الخطيره انو تخصص الاشعه بعمل سرطان ،كانو انت او انتي بتضلك واقف قدام الاشعه وكل مريض بتصورو بتحّصل على اشعه معاه ، طبعا هاد أكبر غلط لانو كلو محسوب وفي وقايه وحمايه للفني سواء من نفس الغرفه والرصاص الي بوقف وراه او مقياس الاشعه الي بكون لابسه الفني وبحسب كم تعرض للاشعه اذا تعرض.
واكيد في اضعاف هاي الاشاعات الكاذبه عن التخصص وطبعا كلها بتحطم المعنويات والنفسيه ولكن اهم اشي انو ما نسمعلها ونعرف شو الصح منها وشو الخطأ ونصلحه للناس.