أنا كنت أدرس دبلوم تربية خاصة ،
بس فعلياً كانت تدور ببالي أفكار عن ترك الدراسة لإني ما كنت أحب التخصص !
والسبب اللي دفعني لدراسة التربية الخاصة هو بس إني معي رخصة مزاولة مهنة ..
أصلاً كنت كاره الدراسة ورافض أتعلم لغة الإشارة ،
ما كنت من جماعة التخطيط للمستقبل والأهداف ووو ..
كان همي أخلص يومي وأنا مبسوط !
لحد ما إجا والدي وتابعني وأصر إني أكمل دراستي ..
فكرت كتير ، ولقيت إنه أقرب تخصص ممكن يناسب رخصة مزاولة الترجمة للغة الإشارة الخاصة بالصم اللي معي هو تخصص التربية الخاصة 
..
ضل أبوي وراي ، ينصحني مرات ، ومرات يبهدلني 
يمكن لإني الوحيد بعد 3 بنات ، كان نفسه زي أي أب إنه يرفع راسه بابنه ويلاقيني متميز باشي .. :”)
تجربتي بالكلية كانت بسيطة ، مع اني دخلت متحمس وبدي أفيد الكلية واعمل دورات لغة اشارة بس إدارة الكلية ما وقفت معي باشي ولا فادتني !!
عملت اناشيد إسلامية بلغة الاشارة مع شركة imedia للإنتاج
وترجمت في المحاكم ، واشتغلت بالمعهد الأردني الكوري لفترة ، و كنت أترجم محاضرات لطالب أصم
و بشتغل حاليا ببرنامج الأطباء السبعة اللي بيجي على قناة رؤيا 
تعلمت من اللي مريت فيه:
انو الواحد لازم يدور على الإشي اللي بحبو وانو كل إنسان بداخلو اشي إيجابي ولازم يعرف وين يفرغ هالايجابية .
وبتمنى كل واحد يقعد مع ابوه ويتفاهم معو لأنو اكتر واحد بحب مصلحتك هو والدك.
